【吹咩 · 求證】 – 起點

近幾年除咗成日練波，又報幾個唔同既聯賽打之外，仲會得閒入場睇甲一聯賽，開始認識更高層次比賽！有時會同朋友吹水講到私人聯賽，一講報幾個聯賽打既時候，大家都會有唔少共鳴 (唔知你地又打緊幾多個? 我就同一時間打緊六個，最近兩三年無論團體奬同個人獎都扲過……）
好多人都問點解打咁多個聯賽？唔多唔少都係因為球證囉……因為打比賽既時候，以前經常都唔明佢地「吹咩」？無掂到又「吹」，後面靚block、偷波又「吹」，pass back係咩標準呀，點先係進攻犯規，咩叫防守者雙腳未企定？太多疑問啦!
犯規都有學問? 於是我諗住上網睇下NBA，上Youtube睇下甲一/甲二比賽，同入場睇多啲甲一學下野啦; 睇睇下原來先知， NBA打緊係NBA球例，同其他同類比賽例如甲一/甲二又有少少唔同（我地一般打緊係FIBA例），嘩、乜咁複雜呀!
NBA咁遠就唔講，講返本地波; 入場睇本地波除咗某部分比較出名既本地球員名外，深信(都幾肯定…) 聽得最多既名應該係禿鷹、奸人堅、佛地魔、四眼……佢地全部都係球證既花名，佢地唔係球員但大家都聽慣聽熟，不過經常都會連同「黑哨」呢個型容詞一齊出現。
而入場睇波都應該聽過人鬧，我肯定係有份鬧果個啦 ! 鬧人「黑哨」，就因為覺得佢地執法有問題，同自己打私人聯賽一樣，走步唔吹，pass back唔吹，三秒又唔吹，打手又唔_吹，成日遍幫紅衫喎 (利申:我係兆榮 fans) ……由於有太多問題球，所以入場鬧球證開始鬧上癮，有得鬧又唔會食T(T-Foul) ，正呀！（可能因為平時比賽鬧多兩句就被T，要發洩下 HaHa）
就係因為打好多唔同聯賽，自己又睇好多波，發現好多問題都係嚟自球證判決; 有一次打私人聯賽，係淘汰賽入面最後三點幾秒，我地隊波贏緊兩分，對手需要由後場開波，當時我隊防守球員只係舉手已經無貼身防守，只係以拖延方法令持球者用更長時間過場，到持球者跑到中圈位置突然自己跌係地下，而當時亦無防守球員接觸到佢，但我隊波就係依剩低一秒鐘被吹判犯規，罰球如果全中咪打和 !果個moment 我要爆，即刻衝過去同球證理論，結果仲要食多個 T，再送多個罰球機會畀對面隊，最後當然輸咗場波。我知道當時太投入，不過我好想知點吹判犯規，而呢個我認為「黑哨」判決改變咗我既人生，我要求證，我決定要做一個「好 球 證」……