【吹咩 · 求證】三年

「三年之後又三年，三年之後又三年，十年都黎緊頭啦老細！」呢一句話好多人都聽過，就係無間道入面嘅經典對白，咁同球証有咩關係呢？原來做一個正式球証比想像中難，第一關當然係要上堂同筆試， 如果係筆試入面未考之前，梗係諗住好似以前會考咁死背爛背啦，點知一考就知 – 瀨 ~ 野 ! 全部都係處景題，唔怪得呀Sir之前話一定要明白背後精神。
好彩 Pass 筆試，之後就要150人裏面篩選118位，之後現場實習又篩選18位，到最後再篩選剩約10位，依10位仲要再實習一年先正式成為「註冊三級球証」。咁點先可以去到國際球証呢，咪就係三年，所以三年又三年囉！
所以好多球迷都會話籃總成日都搵啲「老嘢」吹波，但試問有幾多人會喺當打嘅時候（約20至28歲）選擇做球証呢，自己落場打波好過啦，係咪先？所以其實唔係籃總安排班「老嘢」霸住晒，而係培養一個球証係需要一段好長、好長嘅時間去畀球證落場吸收經驗。而喺呢個咁辛苦嘅漫長過程裏面，對比起我打幾年波所學到對籃球上認知多好多! 而且好多疑惑都全數解開，同時發現自己過去幾年都只係一直用自己把尺去打波同睇波！

今次主要講下：例書第三十條：球回後場違例 (pass back) 定義

講之前必須要引用前輩嘅一句話「例書入面嘅球例其實好簡單，但作為一個球証必須要明白每條規例背後意義!」

1. 運球者原來要三點過晒前場先正式叫做過前場 (*三點過前場指雙腳及帶波)，即係兩隻腳過咗前場但隻手仲係後場拍緊波未過前場，你係可以運球返去後場，但繼續受八秒約束（其實呢樣誤解往往都係入場聽到啲球迷鬧球証嘅其中一個主要因素）
2. 籃板球Pass Back：例如原進攻隊如果係搶籃板過程將球直接拍返自己後場，咁都唔算pass back ?！
點解明明係原進攻隊拍返去後場都唔算呢？就係因為控球權嘅關係喇 ! 因為當進攻隊射完波中框後唔入，由果一刻開始已經唔再擁有控球權，所以就唔算pass back！所以如果要吹pass back前球証會先考慮原進攻隊有無控球權。

對於籃板球，打開私league朋友成日都會遇到好多爭議，但判決會唔會令到大家好疑惑呢? 下集再講……