【訪問 · 聯賽】Game2 Basketball Club
一班朋友打波幾年組成一隊波, 有時總會想測試下大家身手和默契, 不過有甚麼途徑參與嗎? 香港籃球運動近幾年越來越活躍, 參與運動的市民也越來越多, 私人籃球聯賽亦應運而生, 但點先可以令一個私人籃球聯賽有質素? 擁有自已風格?
Game 2 Basketball Club – 一個近一兩年於九龍區假日私人聯賽, 但短短年幾已經有多個組別産生, 每組最少有8隊, 但背後原來只由兩位大學生情侣創辦, 究竟背後有甚麼原因驅使他們去成立一個私人籃球聯賽? 一個非官方的籃球聯賽會遇到甚麼困難? 早前我們HKAlleyopp跟Game 2 Basketball Club 創辦人之一 阿喬進行訪問, 探討香港籃球私League問題。
HKAlleyoop: 有甚麼驅使您哋成立Game 2 Basketball Club?
Game2: 當初成立目的就係首先自己和身邊朋友話想報籃球聯賽, 但當時認識唔算多太多, 咁啱當時比較空閒,
我諗諗下不如自己搞一個啦! 第二個原因係我好希望可以提供一個平台俾一班籃球愛好者, 可以有更多機會跟
唔同球隊切磋; 呢兩個就係我成立呢個私人聯賽嘅目的。
HKAlleyoop: 至於改名為Game 2, 背後有沒有原因或者故事?
Game2: 我改Game2依個名, 源自喺街場打波, 輸咗一場唔甘心, 果刻好想嗌”Game 2” 打多場, 所以我改名做
Game 2 Basketball Club, 希望大家即使輸一場比賽, 唔好灰心會有第二場, 有”Game2 可以打另一舖, 帶出要有種
唔認輸、永不放棄心態。
HKAlleyoop : 幾有意思啊! 你地作為學生, 舉辦一個私人籃球聯賽遇到甚麼難度? 屋企人有冇反對?
Game2: 首先一定係時間分配, 因為我哋只係學生, 星期一至五要返學, 所以聯賽要於星期六日舉行, 暫時管理尚
算可以接受。而平日集中處理比賽之後或者宣傳方面工作, 時間控制方面一定要管理得好好。舉辦一個私人聯
賽過程學到好多事, 除需要作出好好時間管理, 宣傳、跟唔同球隊溝通、設計海報/video 等, 都提供非常多嘅經
驗, 一種學校裡學唔到嘅經歷, 所以屋企人都無反對, 佢哋都支持我去做。
HKAlleyoop: 已經成立兩年, 對你嚟講生活有無改變?
Game2: 首先每逢星期六日都無假放啦, 因為Game 2聯賽暫時集中週未, 逢星期六日我哋都要工作, 除非大節日
。其次最大影響就喺每日都要早起身, 準時起身book場, 因為場地競爭真係好大, 我哋兩位都親自去book 場, 之
後要通知球隊等等, 都需要花好多時間。
HKAlleyoop: 我哋留意到 Game 2 Basketball Club 比其他私人籃球聯賽較少讚助, 對於創辦一個聯賽讚助算唔算
重要? 對於讚助你有甚麼睇法?
Game2: 其他聯賽可能有飲品贊助, 我之前跟唔同球隊溝通過, 發現大家對飲品讚助表態一般。 我反而想著重
有類似可以帶走嘅物件, 例如早前做過冠軍Tee, 反應唔錯, 可以提供一種參與過 Game 2 紀念品。
HKAlleyoop: 一直以來接觸過好多球隊, 有甚麼因素吸引佢哋參加Game 2 Basketball Club?
Game2: 我會認會係比賽及賽後配套, 例如每星期都有一個Player of the week、 比賽相片、Top5 Game Play 片段
等, 令球隊覺得幾新鮮、包裝特別, 球員可以上網搵返自己張相或者Top Play, 之後可以分享畀朋友睇做過得分王
, 另外電子分牌都係一種吸引點, 各種配套都提高佢哋參加聯賽興趣。
(加插game2 比賽相片及 Top 5 play)
HKAlleyoop: 比較多人想知, 你認為私人籃球聯賽同籃球總會籃球認可聯賽有甚麼分別? 以你角度私人籃球聯賽
有甚麼優勢與缺點?
Game2: 我會認為配套方面, 私人聯賽比較有優勢, 例如網上宣傳、數據統計、賽後精華等, 私人舉辦比較多, 感
覺比較多元化, 反觀籃總比賽配套方面較少, 感覺生硬; 但講到缺點, 私人聯賽場地穩定性就比較難控制, 至於官
方聯賽場地就好穩定, 賽期可以預早通知, 所以賽期方面私人聯賽就比較蝕底。
HKAlleyoop: 對於球證質素有無要求? 又例如早前網上見到一個實例, 有位球員好鍾意「出腳」, 對慣犯係參加
資格、執法同判決上有無特別考慮?
Game2: 無論私人或者官方聯賽都有好球證, 最緊要球證判斷清晰明確。至於嗰位「實例」球員, 單純睇嗰段片
的話好難畀我去做一個判斷, 如果我哋睇當時情況輕微, 我哋聯賽先會發出一個口頭警告, 假如情況嚴重, 可能
係關乎到蓄意傷人程度, 我哋聯賽都會考慮將球員或者整隊球隊停賽, 甚至禁止打之後比賽; 始終判決需要睇現
場情況, 要了解清楚整件事先可以有判決。
HKAlleyoop: 睇過咁多次比賽, 你認為籃球裝備對球員表現係咪一個重要因素呢
Game2: 當然唔係啦, 球員技術先最重要, 裝備方面可能都對球員嘅心情有影響, 裝備靚影張相都靚啲, 影相有型
啲! 不過我相信一定係技術行先。
HKAlleyoop: 以你作為一個創辦聯賽單位, 你認為點樣先可以推動本地籃球? 籃球及運動教育方面有無需要增加
?
Game2: 首要我覺得可以令本地籃球接觸層面更加闊, 撇除私人籃球聯賽, 如果一支普通球隊可以報名比賽其實
非常少, 例如康文署搞籃球比賽, 名額始終有限, 並唔係好多隊都可以參加到; 作為一個私人籃球聯賽, 就可以提
供到更加多唔同水平比賽, 令大家可以更加容易參加, 接觸更多籃球比賽, 其次可以提升水平, 從而推動香港籃
球運動。至於籃球及運動教育方面, 可以從小培訓, 例如由學校或者青訓開始, 令大家由細到大對籃球有認識、
訓練技術, 咁先可以令香港籃球提升水平。
HKAlleyoop: 宜家香港已經出現咗全職球隊, 你覺得對本地籃球有無好處, 或者你有甚麼睇法?
Game2: 我當然覺得好啦! 職業球隊香港之前無, 宜家有正式職業球隊對青少年嚟講, 可以帶畀佢哋一個目標,
先不論成唔成功, 有一個願景打籃球可以有全職, 打波都可以成為你嘅工作, 不過我覺得都要慢慢發展, 可能之
後有機會出現第二支、第三支全職球隊, 有更多球隊參與先可以發展到更加成熟嘅全職聯賽。
HKAlleyoop: Game2成立大概有兩年, 依兩年內有咩嘢你認為成功?
G: 如果話成功我又唔敢講, 反而最成功嘅係每次比賽都見到每隊有一大班球員或者一大班兄弟一齊嚟, 感覺好
似畀咗機會佢哋凝聚一齊, 有時球員年紀已經大, 好多人都要做嘢, 可能只有星期日可以一大班兄弟嚟打場比賽
, 即使贏、輸都好, 佢哋都會有傾有講, 打完開開心心一齊去食飯, 反而呢種凝聚感覺令我最滿足。
HKAlleyoop: 對於舉辦Game2以來, 你覺得有咩需要去堅持?
Game2: 我覺得要保持返水準, 我預測未來球隊數目會越來越多, 工作量自然越來越大, 要保持當初成立Game2
目的, 唔可以懶惰, 例如球隊Poster / Video 唔可以因為數目多而懶散唔做!
HKAlleyoop: 現時聯賽分組唔算好多, 將來會唔會考慮增加更多分組, 甚至更高層次球員例如甲一球員等?
Game2: 當然會啦! 始終高水平比賽吸引力大, 但需要循序漸進, 等有機會銜接更高水平組別比賽。
HKAlleyoop: 如果設定一個短線目標, 你認為Game 2要達成咩目標。
Game2: 短線目標希望可以增加參賽隊數, 未來2至3季都希望有更多人接觸籃球比賽。
HKAlleyoop: 至於長遠目標?
Game2: 我有一個想法希望再開設一個聯賽, 係可以有唔同地區嘅球隊佢哋過嚟或者出去嘅一個跨境聯賽, 例如
國內、 國外甚至台灣, 所有參加球隊可以有交流, 呢個目標當然好長遠, 最重要睇未來發展。
HKAlleyoop: 咁我想問你兩位一條問題, 當初開季有無辛酸史?
Game2: 當時可能講緊第一季, 我哋所有數據都係比賽完之後睇片抄低, 但係呢個過程都幾漫長同辛苦, 因為一
開頭的步驟始終唔係太純熟, 可能mark一場數據需要一至兩個鐘, 所以都比較耐, 每次搞完比賽都會好苦惱數據
邊個mark……咁我哋會猜包剪揼, 邊個輸咗都要mark數據。
HKAlleyoop: 但係而家已經用電子板啦…
Game2: 無錯, 宜家進步到可以現場mark就解決咗以前個問題呀!
HKAlleyoop: 除電子板外, 對你嚟講將來引入甚麼器材可以令Game 2發展更好?
Game2: 24秒進攻! 因為而家暫時無24秒進攻板, 如果有機會加入廿四秒板放兩邊底線, 未來都可能引入飲品讚
助, 球員有free drinks提供球隊開心, 我哋又辦得開心!
訪問感想:
「您、喜歡打籃球嗎？」，相信係香港對籃球存在一份熱誠嘅人有好多，好似今次訪問Game 2 Basketball Club 嘅創辦人之一 阿喬，佢就係抱著一股對籃球嘅熱誠，以Game 2 的意思話俾所有人知，唔好輕易放棄。
經過依次訪問，香港人普遍其實好喜歡籃球依項運動，大部分人未必有好似Curry 嘅3分技術、唔會有Irving 嘅手感，但對佢地嚟講，大部分都只係好想一大班人一齊去打波比賽，搵返好似學生時代嘅熱血，以一兩張團隊相、英姿相，代表著一種大家共同努力的印證; 亦有好多學生球隊，認為校內及學界比賽較少，藉以私League 比賽去攞實戰經驗、鍛練自已。 私League 除提供個人數據、相，亦加入賽事錄影、電子分牌，令所有參加球隊可以跟據唔同數據去改善、提升大家實力。但反觀籃總舉辦嘅賽事，咁多年來有提升嗎?
籃球運動只係一項門檻好低嘅運動，只要有一個籃球、走上街場就可以打，但要係香港推動籃球運動，唔可能單靠邀請世界級球員嚟香港辦慈善先會令市民認識，更加需要籃球教育。當邀請到頂級球星，或者世界級賽事，但可惜香港連一個可以代表性嘅正規籃球場都缺乏，究竟仲可以錯失幾多次機會? 近年好多私League 比賽越來越有規模，甚至比籃總賽事更清晰，或者可以考慮下向佢地學習，話唔定會有新景像。