Skip to content
正所謂有板有快攻 ! 一切都係由籃板開始, 搶到籃板跟住正常隊友會post up，隊友「Outlet」之後通常都望插中啦! 依種係現時最普遍進攻模式之一。
插中進攻隊友 (俗稱箭頭)：接「波」跟住就唔洗諗, 直接快攻上籃，只要跑得快，好理想地呢種快攻通常都唔會有防守球員係箭頭前面，咁呢兩分仲唔係食叉燒！
我好似有少少講緊廢話咁，無錯想同大家講呢個情況無咩好講，因為依個係最理想假設; 我想講係同類型嘅另一個情況。
想問下大家係比賽中，有無見過啲隊友或對手係好鍾意一拎到波就只係會向前衝，遇到前面有人乜都唔理 「牛呀!」摶And 1啦!
之後就會開乒乓波mode，自己撞落人地度即係反射動作叫「foul呀!」( 如果隊中有呢種打發既隊友咁一定會明我講咩，好啦入正題！)
一般見好多打私league嘅球員, 通常牛入去都比較容易摶到And 1，但犯規嘅防守球員多數好無奈望住球証:「吹咩?」。例如見最多情況係當嚮雞之後， 好多時球証都會對住防守者講一句「你隻腳郁咗呀!」，唔少人就習慣咗以為隻腳唔郁就得啦，但係有時候防守者雙腳無郁過都被吹犯, 咁又點解呢？
其實吹帶波撞人或阻攔犯規有幾點要注意，首先取決於係唔係屬於一個合法防守。合法防守定義就係防守者必須要正面對住進攻球員，即係如果進攻球員準備撞向你、同你有身體接觸前，你潛意識保護自己，將身體傾側就會變成防守犯規，呢個就係點解球員好多時企定定、雙腳無郁情況下都被球証吹罰原因。
而另外一個情況，當防守球員雙腳郁晒但竟然判進攻球員帶波撞人; 合法防守入面清楚説明防守者係可以向後移動 – 「在建立合法的方守位置之後，球員可以移動來保持原先建立的合法防守位置，一足或雙足可以瞬間離地橫向或向後移動，但不得向前移動趨向控球員」，咁即係麥sir成日提我地球証後輩既一句話「誰主動接近誰」，因為咁我地往往都會以呢一個角度去睇下判吹咩。