【吹咩 · 求證】街例

上星期見天氣好，又唔使吹波同比賽，就落去街場玩下啦，同人鬥波咁啱又撞到啲有趣街例~

隊友射波～「彭 !」唔入，唔怕有籃板 ! 補籃～「彭!」再炒，跟住有一名 敵方友好球員B 飛身過黎搶板，「拍」一聲，波連人帶波打落去，之後。。。。

 

隊友A：喂！犯規 !

敵方友好球員B：吓，籃板無得foul架喎! 哥哥仔你識唔識咩叫 「球手合一」呀!

我見個波都出左界，橫掂都係我地波，咁就同隊友A講: 算啦! 開波啦!

之後打咗兩三球，又有籃板球，被人一拍，個波飛到九丈遠。好我去追啦，個波仲未過中場線，喺未出界前畀我又追到撈得返個波入嚟，見到無人追，咁我咪行返入個場繼續拍波，依位敵方友好球員B 又再出聲。。。。

敵方友好球員B：喂！你出咗去唔可以再入嚟拎波喎

我：吓，點解呀?

敵方友好球員B : 你識唔識打波架! 出咗去入返嚟就唔可以再拎波架啦，唔識例就去報下聯賽打啦！

(一向冷靜嘅我開始著啦……) 我：哥哥仔咁，我犯咩規呢?

敵方友好球員B :（好寸咁）：你唔識就問下人啦！

我：咁我係犯走步呀 ? 定出界? 又或者係其他野呀？

敵方友好球員B : Mine 波 ! ~~

我：你哋波都要俾個原因，大佬!

敵方友好球員B : 你唔識野都費事同你講咁多! 我哋有場紙！

……又係場紙，有牆紙就番屋企痴牆啦 ，然後就沒有然後了……

籃板球同出界大家有好多誤解，可能成日聽到街場啲人亂UP得多，有好多人會信以為真。

先講出界呢個問題，出界定義：例書第23條（球場上的23條XD）清楚說明

–       球員出界是指球員身體任何部位觸及界綫、界綫外地面、或界綫上方的任何物體（球員除外）; 而波出界指個波觸及界綫外的球員或界綫、界綫外地面、或界綫上方的任何物體; 運球定義中提及球員手部未接觸球時，移動步數不受限制下; 綜合以上三點，只要球員於場內救波，個波依然無出界，就算球員已走出界外，但波仍然無出界，所以球員入返個場先再繼續拍波係可以嘅。

至於「球手合一」，呢樣野其實真係存在，首先要明白球手合一指持球手屬於球一部分，但只係講緊手腕以上位置。以前有啲較嚴嘅前輩球證教，當防守者以左右橫向掃控球手時，掃中手腕以上， 由於屬「球手合一」部分, 所以無犯規可以繼續比賽; 但如果動作係由上而下拍打落去隻手時， 咁就屬於打手犯規，不過而家一般如果只中手腕通常都唔會吹，但最後call唔call foul通常都真係好考驗當時球証，因為好多時係一瞬間除左手腕外，可能身體仲會有其他地方接觸到進攻球員而導致其他犯規。

其實講咁耐都只係講緊一個唔夠一秒發生嘅動作，而一個簡單籃板可能會發生嘅野已經可以好多，例如當雙方球員一齊揸住籃板球，大家都搶住唔放手，究竟幾耐先會吹jump波？喺呢個情況下原進攻隊應該係三秒區入面，有無犯三秒呢? 又或者兩個人都揸住個波，其中一方雙腳離地再行兩步，又算唔算走步呢? 有好多類似動作都有可能觸發犯規，所以球証真係唔易做。

如果呢段post畀上星期係街場遇到果位哥哥仔睇到，其實上次打波喺同緊兩位註冊球證講球例，唔知有咩反應……