吹咩 · 求證

8號仔：喂5號仔, 遲啲奧運籃球你估今屆邊隊贏呢？ 5號仔：遲啲? 你講緊2020東京呀仲有兩年幾喎，同埋屆屆都有啦，美國贏梗啦！ 8號仔：我講緊 3 X 3 呀! 新加獎牌項目。 5號仔：咪一樣，是旦搵兩三個NBA，乜都唔洗打啦 8號仔：你唔好成日顧住苦練你個幾下絕招住啦，3 X 3同五打五好唔同嫁，你夠竟知唔知嫁？ 5號仔：咪3個隊友同5個隊友既分別（?反正幾多個隊友都好我都唔多理，只要我一出輕鬆入樽就搞掂對面） 8號仔：?咁除左人數唔同 咁你仲知啲咩呀？安全sir話叫你揀多幾個人入隊，邊個都得呀！ 5號仔：知啦得十二秒進攻嘛! 咁好易啫，叫呀龍返洛黎一開波比佢慢慢背籃牛入去，搞掂easy, 話哂都第一中鋒??

上次講過一個問題，當罰球射出之後再吹判雙方犯規既情況下，會唔會有罰球? 梗係唔會有啦，就算有球隊滿team foul，但因為罰球射出果一刻開始，雙方球隊都未有控球權，點吹罰呢? 所以正確黎講當然係jump波啦！ 講開jump波，如果雙方一齊拎住幾耐先會吹呢？係街場可能聽得最多「1、2、3！jump波。」但係球例入面只係提到： 球例12.1.2 : 當1名或以上不同隊的球員各以單手或雙手緊握球體，如不用粗暴動作則不能獲得球時，則發生「爭球」 所以唔會用幾耐去決定係咪判jump波。 至於好多時滿team foul後，如果有進攻犯規出現，記得唔好再問球証「唔係射罰球咩？」，記住進攻犯規係唔會有罰球射嫁！ 不過其實進攻犯規都會引起球員疑問，其實問先算進攻犯規呢？要成個人企定？隻腳係咪真係唔郁得，咁成個人唔郁得係由人地起動走籃開始計定係投籃果下先計？相信當遇到被球証吹完既人都會追問球証: 咩咩咩~~ 同場邊啲隊友又會話「喂，佢郁緊喎! 」之類！如果大家都遇過呢啲既話，咁就岩啦，下期將會開始主要硏究下進攻犯規。

「天下武功，唯快不破」。 其實現今籃球比賽嘅節奏都越來越快，球証有時睇漏嘢都好正常，例如走步、打手等等，但我見到就一定要吹，而我一直都拎住呢個宗旨做球証，但現時某啲聯賽球証對球例嘅理解又真係差啲，希望佢地可以補吓習嘅同時，令到打緊比賽嘅球員都可以更明白球例。 一個經常出現嘅實例: 就好似比賽仲剩廿幾秒、時間好短，A隊領先兩分，但係team foul滿，而家A隊有一個罰球，罰球出手射唔入，雙方籃底球員好緊張，互相搶位時動作過大，球証吹雙方犯規; 之後由於A隊team foul滿所以B隊射罰球，第一球入第二球唔入，咁呢球籃板梗係更加博命嫁啦!  籃板大家搶唔到，個波跌喺地下，A隊球員成個人訓落去攬住個波，B隊球員梗係衝去搶，其中一位B隊球員紮行馬雙手揸住個波一拉，連埋訓係到個人拉前咗少少，B隊啲人即刻叫 「走步呀！」 然後球証話「我睇到，走步。」，之後B隊開波最後結果? 唔重要啦⋯⋯ 「時間短、動作快」唔代表睇唔到就唔吹，但睇到又唔吹? 其實成以上實例真係錯得好_過分，大家就咁估又發現咗幾多個問題呢？ 首先以上情況最後幾十秒，雙方犯規係唔會有罰球射 （以上情況B隊真心要多謝球証同A隊朋友無任何反應，輸緊有罰球射……)。 第二就梗係走步，其實有個情況成日都會俾人誤會，就係當個球員訓係地既時候而繼續拍住個波又或者好定咁hold住個波，只要個人有少少郁就會吹走步。 但其實就算你個人訓係地，只要你個動作仍然係拍緊波，就繼續係有效運球，更何況上面個情況！ 走步定義：例書25條 (太長講唔晒住)， 25.2.3入面清楚講到：

上星期見天氣好，又唔使吹波同比賽，就落去街場玩下啦，同人鬥波咁啱又撞到啲有趣街例~ 隊友射波～「彭 !」唔入，唔怕有籃板 ! 補籃～「彭!」再炒，跟住有一名 敵方友好球員B 飛身過黎搶板，「拍」一聲，波連人帶波打落去，之後。。。。   隊友A：喂！犯規 ! 敵方友好球員B：吓，籃板無得foul架喎! 哥哥仔你識唔識咩叫 「球手合一」呀! 我見個波都出左界，橫掂都係我地波，咁就同隊友A講: 算啦! 開波啦! 之後打咗兩三球，又有籃板球，被人一拍，個波飛到九丈遠。好我去追啦，個波仲未過中場線，喺未出界前畀我又追到撈得返個波入嚟，見到無人追，咁我咪行返入個場繼續拍波，依位敵方友好球員B 又再出聲。。。。 敵方友好球員B：喂！你出咗去唔可以再入嚟拎波喎 我：吓，點解呀?

「三年之後又三年，三年之後又三年，十年都黎緊頭啦老細！」呢一句話好多人都聽過，就係無間道入面嘅經典對白，咁同球証有咩關係呢？原來做一個正式球証比想像中難，第一關當然係要上堂同筆試， 如果係筆試入面未考之前，梗係諗住好似以前會考咁死背爛背啦，點知一考就知 – 瀨 ~ 野 ! 全部都係處景題，唔怪得呀Sir之前話一定要明白背後精神。 好彩 Pass 筆試，之後就要150人裏面篩選118位，之後現場實習又篩選18位，到最後再篩選剩約10位，依10位仲要再實習一年先正式成為「註冊三級球証」。咁點先可以去到國際球証呢，咪就係三年，所以三年又三年囉！ 所以好多球迷都會話籃總成日都搵啲「老嘢」吹波，但試問有幾多人會喺當打嘅時候（約20至28歲）選擇做球証呢，自己落場打波好過啦，係咪先？所以其實唔係籃總安排班「老嘢」霸住晒，而係培養一個球証係需要一段好長、好長嘅時間去畀球證落場吸收經驗。而喺呢個咁辛苦嘅漫長過程裏面，對比起我打幾年波所學到對籃球上認知多好多! 而且好多疑惑都全數解開，同時發現自己過去幾年都只係一直用自己把尺去打波同睇波！ 今次主要講下：例書第三十條：球回後場違例 (pass back) 定義 講之前必須要引用前輩嘅一句話「例書入面嘅球例其實好簡單，但作為一個球証必須要明白每條規例背後意義!」 1. 運球者原來要三點過晒前場先正式叫做過前場

近幾年除咗成日練波，又報幾個唔同既聯賽打之外，仲會得閒入場睇甲一聯賽，開始認識更高層次比賽！有時會同朋友吹水講到私人聯賽，一講報幾個聯賽打既時候，大家都會有唔少共鳴 (唔知你地又打緊幾多個? 我就同一時間打緊六個，最近兩三年無論團體奬同個人獎都扲過……） 好多人都問點解打咁多個聯賽？唔多唔少都係因為球證囉……因為打比賽既時候，以前經常都唔明佢地「吹咩」？無掂到又「吹」，後面靚block、偷波又「吹」，pass back係咩標準呀，點先係進攻犯規，咩叫防守者雙腳未企定？太多疑問啦! 犯規都有學問? 於是我諗住上網睇下NBA，上Youtube睇下甲一/甲二比賽，同入場睇多啲甲一學下野啦; 睇睇下原來先知， NBA打緊係NBA球例，同其他同類比賽例如甲一/甲二又有少少唔同（我地一般打緊係FIBA例），嘩、乜咁複雜呀! NBA咁遠就唔講，講返本地波; 入場睇本地波除咗某部分比較出名既本地球員名外，深信(都幾肯定…) 聽得最多既名應該係禿鷹、奸人堅、佛地魔、四眼……佢地全部都係球證既花名，佢地唔係球員但大家都聽慣聽熟，不過經常都會連同「黑哨」呢個型容詞一齊出現。 而入場睇波都應該聽過人鬧，我肯定係有份鬧果個啦 ! 鬧人「黑哨」，就因為覺得佢地執法有問題，同自己打私人聯賽一樣，走步唔吹，pass back唔吹，三秒又唔吹，打手又唔_吹，成日遍幫紅衫喎 (利申:我係兆榮 fans) ……由於有太多問題球，所以入場鬧球證開始鬧上癮，有得鬧又唔會食T(T-Foul) ，正呀！（可能因為平時比賽鬧多兩句就被T，要發洩下

喜愛打籃球既朋友大家記唔記得自己幾時開始打波呢?小學？中學定係踏足社會之後？相信如果由小學或中學時代開始打波，「校隊」呢個名大家都唔會陌生，大家入過校隊後，從中當然會學到唔少籃球技術及知識; 每日放學練完波後又會約埋朋友去街場打下波，咁又一日校園生活！ 另外一群朋友，喜歡籃球而到中學時又無機會接觸過訓練，每日只好係街場自行修練，希望自己可以係街場練到既戰鬥力，對抗班著住整齊校隊波衫對手。 至於街場既文化，大家都知已有既定規律（叫就係嫁啦!）所以基於呢條定律下，街場成日都會有人嘈交，當中有唔少內容大家應該由細聽到大，總之你有你理由叫犯規，我有我理由話無犯規。 例子: 1.打手，你個波射完出手先打到你喎…… 2.出界前扲返個波，入界之後再行返入個場繼續拍波得唔得…… 3.無論控球在手或者上籃ing，只要有身體接觸，就有理無理叫foul……   基於各種原因，只要細心諗一諗，其實大部分都因為 –『 無·球·証·』 我係一個機會下開始接觸私人地下籃球聯賽，一向係街場都覺得自己好勁既我，第一次接觸全場時簡直就同唔識打波無分別，我更加開始討厭球証呢個在場左走右走既角色（當然食T foul就一定唔少得）; 我開始有少少明白，點解以前有咁多街場?仔鐘意叫foul。 約半年後，果屆聯賽就結束，雖然呢一屆係無咩貢獻下完咗，但我得到班隊友幫我改新名 – 「練習射手」……為証明自己真係識打波，所以決定繼續打落去，不過「練習射手」依一個外號仍然跟住我，一打私人聯賽就打咗六，七年到而家都仲打緊。